Allaha hamd, Pygamberimiz Muhammede salat we salam bolsun.

Sorag: Esselämu aleýkum. Ertir namazyň wagty haçan gutarýar. Daşary ýagtalmanka asmanyň ol ujy gyzaran wagtynda namaza başlasaň bolýarmy? Allah razy bolsun sizden.

Jogap: Waleýkum esseläm we rahmetullahi we berekatuh.

Erte namazyň wagty: ikinji fejriň ýagny daňyň atmagyndan başlap tä gün dogmagyna çenli dowam edýär.

Arapçada fejir diýmek: daň agarmagy, daň atmagy diýmekdir.

Fejiriň iki görnüşi bardyr:

1-Fejri käzip (ýalançy fejir): gündogar tarapda göz ýetimiň aňry çäginde dikligine döreýän ýagtylykdyr. Munuň sähelçe wagt yzyndan ýene garaňky düşer. Şonuň üçin muňa ýalançy fejir diýilýär. Bu ertir namazynyň wagty däldir.

2-Fejri sadyk (hakyky fejir): gündogar tarapdan daş-töwerege ýaýrap gidýän ýagtylykdyr. Munda ertir namazynyň wagty başlaýar.

Pygamberimiz (sallallahu aleýhi we sellem) Sahyh Muslim hadys kitabynda gelen hadysynda şeýle diýýär:   

(وَوَقْتُ صَلاَةِ الصُّبْحِ مِنْ طُلُوعِ الْفَجْرِ مَا لَمْ تَطْلُعِ الشَّمْسُ (رواه مسلم

“Erte namazyň wagty fejriň dogmagyndan (ýagny daňyň atmagyndan) tä gün dogýançadyr.”

Salamat boluň.