Allaha hamd, Pygamberimiz Muhammede salat we salam bolsun.

Sorag: Esselämu aleýkum. Käbir musulman oglanlar balaklaryny topukdan edip gysga geýýärler? Bunyñ sebäbi näme? Allah razy bolsun!

Jogap:

Waleýkum esseläm we rahmetullahi we barakatuh.

Balagyñy topukdan geçmez ýaly edip gysgaltmak sünnetdir. Bu mesele hadys kitaplarymyzda meşhur bolup, köplenç geýim-gejim ýagny lybas bölüminde aýdylyp geçilýär.

Eger-de bir kişi tekepbirlenmek niýeti bilen balagyny topukdan uzyn edip gezse, kyýamat gününde Allah Tagala ol kişä jezä höküminde: ýüzüne seretmez, onuñ bilen gürleşmez, ony günälerden päklemez we onuñ üçin azap bardyr.

Bu barada Pygamberimiz (sallallahu aleýhi we sellem) şeýle diýýär: “Üç kişi bilen Allah Tagala kyýamat güni gürleşmez, olara seretmez, olary päklemez we olar üçin azap bardyr. Olar: Lybasyny (balagy, dony) topukdan aşak geçirip uzyn edip geýen, beren zady üçin minnet eden we söwda-da harydyny ýalan ant içip öwen.”¹

Başga hadysda: “Lybasyny tekepbirlenip ýerden süýräp gezene, Allah Tagala kyýamat güni seretmez.”²

Bu hadyslar tekepbirlenip balagyny topukdan aşak geçirenler baradadyr.

Eger tekepbirlenmezden, balagyny ýa-da donuny topukdan uzyn edip gezse, onuñ jezasy topykdan aşaklygyna näçe geçen bolsa, şonçalyk edip ot bilen jeza beriljekdir.

Bu barada Pygamberimiz (sallallahu aleýhi we sellem) şeýle diýýär: “Lybasyñ topukdan näçesi geçse, şonçalyk bölegi dowzahdadyr.” ³

Ebu Said el-Hudri (radiallahu anh) rowaýat eden hadysynda, Pygamberimiz (sallallahu aleýhi we sellem) şeýle diýýär: “Mü'miniñ (erkegiñ) lybasynyñ uzynlygy dyzynyñ ýarysyna çenlidir. Dyzynyñ ýarysy bilen topuga çenli bolsada, zyýany ýokdur. Topukdan aşak geçeni bolsa, dowzahdadyr....” ⁴

Bu hadyslar diñe erkeklere degişlidir. Zenanlaryñ lybasynyñ aşagy bolsa, uzyn bolmaly we doly aýaklaryny örtmelidir. Hatda artyp ýerden süýrensede günä ýokdur. Bu barada sahyh hadyslar bardyr.

Allaha hamd, Pygamberimiz Muhammede, ähli-beýtine we ashabyna salat we salam bolsun.